قصائد

عمرو حسن لو كنتي استنيتي شوية كلمات القصيدة كاملة

يقدم لكم موقع كلام كتب قصائد الشاعر عمرو حسن من اجمل القصائد للشاعر عمرو حسن ومنهم
( خلينا صحابجوابي ده الأخير ليكيهيبتامرة واحد نوفمبر مشهد مسافر – قصيدة مكتبهاش نزار – حاسس كأني On the run – اشبعي بيهملو كنتي استنيتي شوية – الشتا ) وغيرهم الكثير

لو كنتي استنيتي شوية
كان يمكن نتجوز
ونجيب أطفال سُّذج تشبهنا
ونقضي السهرة بنتفرج علي فيلم قديم
وننام بنفكر في حياتنا
فتقولي لنفسك : لو كان بيخونني كانت مناديله هتعرق روج
فاضحك وانا نايم وافردلك ايدي
فتنامي ببطء وتحطي اديكي ف ايديا

لو كنتي استنيتي شوية
كنت هاذاكر لعيالنا حساب
واشتكي من نقص الملح ف اكلك
واديك المصروف الشهري
فيضيع نُصه ف تجديد الأوضة وستارة البلكونة البحري
ويهل علينا الشهر التاني نسهر نحسبله
العب ف التراس مع ابوكي طاولة واتغلبله
تضحكي / اضحك
تندهيلنا للغدا نتغدي
كان زمان العمر عدي خفيف عليا
لو كنت استنيتي شوية
كنت هابوسك قبل ماسافر ع الباب
من غير ماولادنا يشوفوا
ويمر عليكي الليل
تقري ف اوراقي علي المكتب
فتلاقي قصيدة قديمة
تقنعي نفسك انها ليكي
تقريها لجارتك في التليفون
وتنامي وهي ف حضنك تستنيني ارجع
وتقولي بحبك فاسمع
وارجع اسرع
تبوسيني قصاد الباب من غير ماولادنا يشوفوا
وتأجل حضن كبير للسفرية الجاية

لو كنتي استنتي شوية
كنا هنضحك ع الشعر الابيض
اول مايشب ف راسنا .. تصبغي شعرك
افهم .. تضايقي .. ماهتمش
احلفلك ع المصحف انك اجمل من كيت وينسلت
فتبان ف عنيكي فرحة وتنزاح الكآبة
تقوليلي ان انا اجمل من رشدي اباظة
اضحك
كداب بيجامل كدابة
كنا زمنا بنضحك ع الماضي
ونجهز روحنا للرحلة الجاية
بالذمة مش كل المدهش ده
كان يستاهل تستني شوية.

إستمع إلى قصيدة لو كنتي استنيتي شوية للشاعر عمرو حسن  من حفل ساقية الصاوي

قصيدة لو كنتي استنيتي شوية للشاعر عمرو حسن

الوسوم

مقالات ذات صلة

اترك تعليقاً

لن يتم نشر عنوان بريدك الإلكتروني.

error: Content is protected !!
إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock