قصائد

جوابي ده الأخير ليكي قصيدة عمرو حسن

جوابي ده الأخير ليكي قصيدة عمرو حسن

جوابي ده الاخير ليكي

جوابي ده الاخير ليكي
يا معاليكي
يا ست الحسن
يا سبب الحزن والعلة
يا شجرة حسبتها ضلة وطلعت نار
بداية القول
مساء الخير على الازهار على خدودك
مبنجرحش ومبنسمحش لحد يقول كلام عنك
لذلك ثُمّ اما بعد
انا الطفل اللي كان ف عنيكي متشعبط
يشوفك روحه تتلخبط
وقلبه ابن الحرام يضعف ويستعبط
كأنك زار وانا الدرويش
كأنك غار وانا الحرافيش
كأنك كنتي قرش حشيش دخل رئتيني وملاني
كأنك دار وانا اللي مليش سوى الدار اللي لماني
بغض الجرح مين خان مين
ومين قصر مع التاني
وغض الطرف عن اسمك وطعم خروجه ف لساني

انا مليت من القِصة
ومن لعبة خلاص لسة لقيتك غيمة ف حياتي حسبتك مطرة قومت جريت
وفجأة لقيت مفيش غير ليل
سحابة ضلمة كنتِ انتِ
اشوفك ف الوجع بنتي
واحسك ارضي وسفينتي
وشمس بتملى ليلي شروق
مفيش كام يوم لقيتني بفوق
واشوف القاتل الفعلي
لقيتك ارض متضمش سوى المطاريد
وانا عيل بيفتح إيد
يشوف خطك على كَفه
عنيا عيال اذا بصيتي يتدفو
حسبتك أُم بتدور رَحى الأحضان على عيالها
لقيتك ماسكة كاتم صوت
رصاصك فات وجع جواي

جوابي ده الاخير ليكي

وهو يا حلوة يعني الموت بيفرق شكله كان ازاي
وهو الجرح للستات ومش لينا
ما فيه رجالة بتعيط
وف رجالة بتفكر ف عِز الليل ف ناس باعو
وفيه راجل اذا فات ف المحيط وجعه ما بيساعه
وفي عناوين بتتلخبط
وفيه تفاصيل بتتشخبط
وفيه اطفال ما يتدولدوش ف مستقبل مجاش قدام
وفيه زفة ما بتقومشي
وفيه فرحة ما بتدومشي
وفيه نغزة ف صميم الروح
مادام ف القصة فيه دابح

اكيد ف القصة فيه مدبوح
ولو كان القتيل راجل
ف دمه بيبقى مش بالسهل
خسرتي معاه وجود الأهل
خسرتي الحضن واللمة
خسرتي الضهر والضمة
وبكرة هتندمي لما
تحسي البرد من دونه
ياريتك شوفتي ف عيونه حنان الاب
انا الشخص اللي كله عيوب لكن مليان حاجات تتحب
انا الشخص اللي كله عيوب لكن مليان حاجات تتحب ..

عمرو حسن
عمرو حسن

قصيدة كلام متقالش فى جوابى الأخير

أبوس ايديكي قبل أي كلام
فرض احترام
وحق حُب ف يوم من الأيام 
كان هو أجمل حاجه ف حياتي
واتلو السلام كالرجال أوقات مابيفارقوا
اديكي حقك عليا ف الغياب تقدير
انا شفت منك برضه حلو كتير
والله فرق كبير بين اختلاف وخلاف
احنا اختلفنا ويجوز مابقاش ما بيننا نصيب
لكن ما بيننا سنين كملها رب حسيب
والراجل اللي يعيب ناقص مالوش ذمه
باسم الحاجات المهمه
باسمك ف بدأ القول 


وباسم كل عزيز كان له مكان بينّا
ماتزوديش اللي بيننا بجرح هـيدينّا
خلى الحاجات طيبة
ووشوشنا مترتبة
والصورة متركبة مطرح ما سيبناها
وبلاش يكون حُبنا موجه ركبناها
لا كلامنا كان عادي
ولا كنا زي الخلق
من يومنا متخانقين
من يومنا جوز مجانين ومشينا على كيفنا
مانكونش ليه على كيفنا واحنا متفارقين !
مانكرش فيه أوقات بيكون شيطاننا صديق
وساعات بنرمي كلام مايكونش كله بريء
وساعات بنتوعد بحاجات مانعملهاش
بس احنا جوانا ماشيين وماكرهناش
عن نفسي مش كاره
أنا باحكي عن نفسي 


وبرضه عن نفسي باتمنى وادعيلك
كل الهنا يجيلك
يارب منديلك مايشوفش عمره دموع
وتكون ليالي الرضا بالسبعه ف الأسبوع
يشهد عليا اللي خلاني اشوفك احن
اني حزين مع إن
ده قرارنا واخترناه
بس الوجع منطقي وان كنا فضلنّاه
فياريت تقولي غلط
لكن أكيد ماقصدش
وان يسألوني هاقول أهو ربنا ما أرادش 

قصيدة كلام متقالش فى جوابى الأخير

عمرو حسن
عمرو حسن

هي جميلة قوي
ومنظمة وطيبة 
وذكية وجريئة
وقوية وبريئة
لكن مافيش رابط
طلقة فراق صابت
والعلة ف المتصاب
وعشان مابيننا صحاب
وبيننا ناس عارفين ان احنا كنا اتنين
بس بخيال واحد
خلينا متفقين نقول كلام واحد
قسمة ونصيب وخلاص
وهتفضلي ع الراس مهما السنين مرت
مهما الخيوط كرت والعمر فات بيّا
هتفضلي الملهمه والبنت ف النية
المخرَج اللي لقيته ف دايرة مقفولة
وأول ظهور فعلي 
للسيدة الأولى
شمس الغرام البكر 


أول دفا بيمر ف سقعة الأيام
وهتفضلي الدبدبة من زهوة البدايات
ريحة حنين لحاجات
يسألني عنك قلبي قبل النوم
تسألني عنك ياقة قميص أزرق
أو كرسي عطفتي مرة عليه وسندتي ايدك
يسألني عازف ايقاع عن صوت مرورك جنبي ف الشارع
ويسألني الغياب
يؤسفني أفتح باب لا تجلسي خلفه
وانتي الكلام كله من ياءه إلي ألفُه
هنعمل ايه ف اتنين اتفقوا ف اختلفوا
كل الحلول اللي كانت ممكنه اتعملت
معادلة واكتملت 


وربنا الغالب
سالب وجعنا في موجب التفاصيل
بتساوي صبر جميل على ذكرى بالسالب
سيبيني افضفض بقا
دول كلمتين يعني
كان جرح ووجعني وقولت ما بدالي
وانتي ف جرح قديم قولتي مابدالك
هابوس ايديكي احترام ان جيتي على بالي
وانتي اسمحيلي ابوسها ان جيت على بالك
دول برضه مش ساعتين
دول عمر والله 


ده انا كنت علشانك بازعل مع العالم
باتحدى كل الناس
كنت ان تحوم سيرتك
اضحك ويلقوني باصبح خفيف الوزن
كنت ان يغيب اسمك يمُر فيا الحزن ويمد ف جذوره
نتلاقي زي عليل لقى حد بيزوره
وسط التعب والهم
لو جيتي كنت أهتم واضغط على ألمي علشان مايوجعكيش
وكنتي قبلة حياة تديني فرصه أعيش
لولا شوية بُعد اتسللوا بالغلط
وكبروا بغيابنا
واتحولوا للبلاب ملفوف على بابنا
لولا اللي نقلوا كلام وانسحبوا بالأيام
ولولا تركيبتك 


ولولا تركيبتي
لا كنت انا سيبتك
ولا كنتي يوم سيبتي
البعد ياحبيبتي كان حل ماله بديل
غاب النهار واستنيناه ميت ليل
والوضع ده أحسن
انا ناسي كل جراح مرت بايد منك
انسيلي كل هموم عدت عليكي ف يوم
قولي ده واد طيب
بس الزمن جه عليه
واداني ياما ايديه وسندت وأنا صافيه
وهاقول دي ست النسا
الطيبة الدافية
بلاش نكون ف السوق ، سوق الكلام المر
الحرة حبت حُر
واتفارقوا بالأيام 


وابوس ايديكي بعد كل كلام
يتقال عليكي او يكون عنك
ماتزعليش وخلاص
ولا يتزعل منك
يا اللي انتي بيكي نسيت كل اللي كان بيغُمّ
يا طفلة ساعة اللقا أسميتها دوم دوم
وقلبي من وقتها اتعلم الطيران
واتعلمت تنورة تبتدي الدوران
أنعم وأكرم لقا 


لما الفراق بيطيب
خليني ف التجربة
أب وصديق وحبيب
وقولي سيبنا وبس
مش شرط مين بيسيب
ماتفرجيش الناس على جرحنا المستور
ولا كسرنا المجبور
وصدقي حكمتي أو لوعة المكسور
اللي اتزرع ف الضل
بيموت ف أول نور

إستمع إلى جوابي ده الأخير ليكي

 

جوابي ده الأخير ليكي قصيدة للشاعر عمرو حسن

الوسوم

مقالات ذات صلة

error: Content is protected !!
إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock